Alcordances

Falate seliquino cada nueche;
prisioneros los dos de atapeceres
que diben dibuxando con les sombres
paisaxes imposibles per la casa.

Momentos compartíos na clarixa
de díes que nun tornan a topanos.

Refuxiaos los tos llabios en los míos,
los mios güeyos clavaos nos tos güeyos,
buscando amaneceres compartíos,
escaeciendo'l mundu cotidianu.

La vida yera maxica y senciella...
y creyimos que sería pa siempres.

Dempués llegó l'iviernu a nuesa casa,
y una mañana fría de payares
to lo que yera nuestro
principió a derrumbase nun suspiru.
Nin tú ni yo supimos
atopar les pallabres necesaries.

Nun quiero escaecer aquellos díes.
Guardo les alcordances na memoria
y abellúgome n'elles cada nueche
pa caltener una esperanza piquiñina
nun amanecer que nunca llega.